Heilsudagur að hausti - 30. ágúst

 

Við gripum tækifærið því spáin var glimrandi góð, annað eins bjartviðri ekki í kortunum og við auðvitað í startholunum. Þegar kom svo að heilsudeginum var annað uppi á teningnum, þokuslæða klæddi dal og laut en það virkaði bara spennandi fyrir nemendur að ganga inn í þokuna, allt svo leyndardómsfullt. Þegar leið á morguninn létti svo til og sást til sólar. Nemendur skemmtu sér konunglega þennan daginn og fóru sáttir heim.

 

Nemendur á yngsta stigi fóru í berjamó upp í Kolabotna.  Krækiberin voru mörg að stærð við vínber og því auðvelt að fylla alla dalla. Afraksturinn ætla svo börnin að nýta sér í heimilisfræðinni í alls konar rétti og sultur. Þegar komið var úr fjallinu fóru börnin í leiki við skólann.

     

 

   

Nemendur á miðstigi mættu til leiks á Hólmahálsi og þaðan gengu þeir sem leið lá niður á Skeleyri. Eftir að hafa spókað sig þar um tíma gengu þeir með ströndinni og enduðu í sundlauginni þar sem þeir skoluðu af sér ferðarykið og skemmtu sér.

 

Nemendur á elsta stigi fóru Kálkshringinn. Þeir hófu leik við Kirkjumiðstöðina og gengu inn í dal, fóru þar yfir brúna innan golfvallar og luku svo Kálkshringnum eftir að hafa tekist á við fjölmörg skemmtileg verkefni og keppt í ólíklegustu íþróttagreinum sem að þessu sinn byrjuðu allar á bókstafnum B. Að loknum hringnum var svo stigahæsti keppnishópurinn, sá rauði, sæmdur titlinum Kálksmeistarar.